尋找奧思的翻版

之前美容股奧思(1161)，14年純利升40%，喺同年12月16日宣布增派息之後，股價上升超過50%。而舊年12月派過中期息的現代美容(919)，中期純利按年升24.4%，中期息增加36%。兩間美容公司的純利同派息都有增長，顯示香港的美容業正在翻生緊。由於奧思已經升左一大截，仍未升得多的現代美容，值得分析一下，睇睇有冇機會跟到奧思的升勢。

現代美容有幾個方面的優勢。第一，股權集中。股權分布方面，大股東曾裕持已發行股份佔總發行的74.03%，幾乎達持股上限。第二，街貨市值細少，按0.68元股價計算，換算後公眾持有股票的市值只有1.543億元。

第三，潛在的股息率高，去年底公布的中期業績，純利按年升24.5%至4550萬元，中期派息按年升36%至0.034元。假設末期息都可以同中期息一樣幅度咁增派，預期14年全年會派0.0612元，按0.68元股價計，是9%股息率，比人仔一年定期4.4厘左右多一倍有凸。增派末期息是有一定機會，因為美容業目前有向好的趨勢，而且現代美容每股現金有0.514元，要喺末期息每股派0.0272元，游刃有餘。第四，有殼股性質，市值得5.94億元，細細粒容易賣。按0.68元計算，市值扣除資產淨值後，都只係得4.45億元，以5億殼價計價，雖然折讓唔大，但起碼冇溢價。

公司有四個不確定性因素。第一，核數師對中期報告有保留，不過核數師話，原因是岩接手唔夠時間check數，暫時可以不理呢點。第二，係非流動負債項中，遞延收益非常高，達6.38億元。第三，係全年純利係咪可以如願增長。第四，從今年初開始，股價升左17.24%，升左唔少啦，而家都接近一年高位。

除左現代美容，有一啲唔係美容業，但有相近性質的股票，例如白馬媒體(100)、專業旅運(1235)、天大油管(839)同埋精熙(2788)等，呢啲就以後再講。上次睇好的嘉瑞(822)最後派息同純利不似預期，希望呢啲股唔會重蹈覆轍。