男人唔壞 女人唔愛

好多人以為，揀高息股只可以收到股息，但會犠牲左大升幅，其實升幅同股息，係可以兩者兼得，關鍵係市場上的資金同股票供應兩個因素。

股票其實都係一種貨品，有供有求。凡係供求的野，Demand高supply低，股票會係喺市場追逐之下向上升；Demand低Supply高，股票會喺市場沽壓之下下跌。有時候，明明冇乜實業的垃圾股，佢股價可以升幾個開，正正常常做生意的公司，股價反而冇得升甚至大跌，你可能覺得呢啲現象唔合理，好似同情場一樣，男人唔壞，女人唔愛。但如果你從股票供求層面出發，你就會明白，其實一切係市場上的資金作怪，股價並不反映公司真實價值。不過，有啲唔同的係，壞公司的股價上升，多數都有原因。

普遍的原因，不外乎兩個。第一，係有一個或一班莊家收左好多股票，反正貨源歸邊，要將股價推高可能只係一、兩個千萬就得，只要升勢持續又明顯，跟住就好容易吸引到一班散戶追入，呢個時候逐啲逐啲將股票賣俾散戶就有得賺。第二，係要配合供股或者配股等的財技，令股票升勢持續又明顯，來製造其他人想買股票的意慾，然後趁機印多啲股票，賣俾人地。要知道，公司印股票就同印牆紙一樣，成本唔使幾多，但投資者買股票，果啲係現兜兜的Cash來的﹗垃圾股可以升得誇張，部分原因就係呢兩點。

至於點解明知有啲股票上升係有人炒作，都會有咁多老散去買呢﹖oh，人性逐利，有人見到某啲股係咁升，自然幻想自己買入都可以再享受到升勢，咁咪追入囉。

高息打底　炒作更安全

扯得有啲遠，返去高息股的話題。前文講過，供應少需求大，股價就可以升，所以，只要高息股具備呢個特點，亦可以大升。例如近來升勢明顯的高息股奧思(1161)，舊年12月16日宣布增派末期息，當時股價大約0.69元，大股東合共持有62.4%，即係最多得37.6%股權係市面上流通，股權尚算集中。按0.69元換算，呢批喺市面流的股票得值1.98億元，細小的市值兼相對少量的股票供應，令莊家輕易收貨，收夠左就可以炒上。而家奧思股價1元，比當時升左44.9%，計埋派發左的股息，3個月半累積升左52.2%。除左奧思，有唔少股息超過6%的股票，都曾經喺宣布派高息後，出現明顯的升幅，包括宏基(2288)同皓天財經(1260)等。所以，高息同大升幅，係可以同時出現的。

話時話，高息本身亦係有利股價上升的因素之一。奧思宣布派息果日，對照的一年股息率有8.7%，屬於高息水平，你企係莊家的角度，最後就算炒作不成，都有8.7厘股息收入喎，而家做一年人仔定存都係得4厘多啲咋﹗莊家買奧思有高息打底來炒作，何樂而不為﹖

如果你咁有耐性看到來呢度，恭喜你，你已經俾我呢個標題黨呃左，呢篇文其實係講股票市場，唔係講情場，哈哈哈~