做財經公關 生意好好賺

服務業，有一個普遍性，唔需要買好多好似機械同廠房、呢啲成本又重建設時間又耐的固定資產，只要你有人脈、服務有專業性同埋需求不減，係一盤好好賺的生意。皓天財經(1260)，係本港財經公關龍頭，近乎係一隻收入高開支低的金融服務業現金牛。

睇睇投資銀行，啲iBankers可能幾個人就組成一條team，幫啲客人解決法律、會計、融資同埋推銷，射左啲股票出街之後可以賺幾百萬元的佣，甚至上億元，但開支方面，主要就係人工、寫字樓租金同雜費等。所以作為平凡人的我地，總係聽到有ibankers花紅一年分到幾個百萬、千萬，就係咁解。

財經公關的難度雖然不及投行，但都係一種專業。門檻唔算高，但冇咁上下名氣同專業水平，間公司亦做唔起。反之，做得起的壟斷性好大，因為公關就係間公司公眾同投資者市場形象主要搞手之一，衰一次俾幾多錢都買唔返。有啲名氣的公司，自然寧願俾貴少少，都要個穩陣啲公關顧問。皓天係行內名氣頗大，翻查過去一年的IPO公司，唔少大集資額的公司都係揀佢，包括萬達(3699)同中廣核(1816)等，生意自然做得風生水起。

主席冧掂內地客

不過，最重要係個老闆劉天倪係內地有人脈，據係財經公關做過的行家，劉天倪同某些內地大公司的老闆老友，啲老闆會幫手向其他準備來港IPO的公司推薦皓天。所以，皓天過去兩年來接左唔少內地公司的單，以舊年的IPO市場份額同客戶總集資額計，仲做左行業第一。而且，財經公關接左IPO之後，間上市公司一般會搵返同一間公關負責以後的服務，例如業績發布工作和國際路演等。所以，皓天接到愈多IPO的單，對佢長遠的業務愈有利。

股票市值又細又集中

論數據，以14年中的中期數據，皓天的毛利率約49.8%，唔算非常高，但成本控制做得已經很不錯了。每年派完高息之後，凸左一堆現金出來，擴展業務又用唔着，要用信達(1359)等的公司債券來避免資金閒置，一副現金牛的樣。以股價1.6元計，市值16億元，屬於細股，加上劉天倪持股75%，理論上得返4億元的股票係市場上交易。根據中央結算系統，呢4億元股票，81.97%集中係10間券商手上，意味大量股票有可能集中係某些大戶手上，貨源容易或已經歸邊。

如果話唔好處，就係皓天靠食內地客，但大多數巨型國企或民企已經上左市，皓天將來可以食大习的機會唔多，我有啲驚過去三年亮麗的業績無以為繼。但目前來睇，市值細、貨源歸邊同高息紀錄，呢三點好吸引，唔打算賣持股住。如果係隨大市明顯下挫而令皓天股價都下跌，遇着呢個情況可能增持，比較大機會係1.53元或以下逐步買入，因為呢個水平對應的股息率都有6%。