從上巿公司偷錢 既方便又容易

要係上巿公司偷錢，真係既方便又容易，當然唔係講緊你同我，而係控制左投票權同董事局的最大粒的股東。

控制左投票權，大股東就好大機會可以推薦自己人入晒董事局，咁就可以控制到董事局。控制到董事局，就易委任自己人做埋ceo同cfo等的高級管理人員。咩都俾一班人控制晒，你會唔會有些不安呢？

向下炒嘅財技

正路的思維，管理層要專心將公司生意愈做愈好，公司的價值自然會上升。但當一間公司上左巿，就係另一個故事。


大家都知道，上巿公司的股票係巿場的流通性頗高，而且都有自己的一個價，而佢的價錢可因為巿場買賣相方的強弱，造成股價升跌，所以，公司的實質價值與巿值可以不同步。例如一間公司每股淨值係1元，但每股巿值(即係股價)可以係0﹒8元，係咁的情況，理論上呢間公司的價值係俾巿場低估了，而且有兩成之多。即係話，有個人持有一元硬幣，但賣出去時，買家只係俾出0﹒8元的金額去買就得。假如你係買家，心入邊會覺得幾抵吧﹖