中國天然氣嘅mission impossible

中國天然氣(931)，名入邊有天然氣三個字，咁簡志堅實際上將會重組中然氣來做啲咩﹖今時今日老千股當道，唔少股票掛個名，乜乜氣、乜乜醫療或者乜乜網絡，然後實質上就乜都冇做。所以睇中然氣，都要睇實佢有冇plan，係咪真係做天然氣嘅野，同埋衡量做到嘅機會有幾大，唔能夠單睇簡志堅過去重組中國燃氣(384)嘅往績，就盲目相信中然氣都會好有景。

綜合截至2015年1月11日嘅通告，相信中然氣將會集中做液化天然氣(LNG)產業下游嘅市場，業務範圍包括三樣。一，租賃或售賣LNG作為燃料船隻及重型卡車；二，改造船隻同重型卡車為LNG驅動；三，建造及營運LNG碼頭加氣站同汽車加氣站。業務地區涵蓋上海、工蘇及內蒙古等省份。


由於簡志堅嘅出身係會計師，專業係財技，唔太可能熟悉運作LNG嘅實業。不過，中然氣夥拍巨型油氣國企中石化(386)，由中石化提供興建加氣站同處理LNG嘅技術。至於LNG交通公具嘅銷售，或將一般交通公具改裝為LNG驅動，都有包括國企徐州機械工程集團等公司提供，或承諾合作。

目前按牌面來睇，中然氣嘅業務發展計劃，其實都正路，亦都make sense。但都係果句，一日未見到營運數據，或見實際投資項目，一日都未判斷到中然氣嘅業務係堅定流，需要等時間證明佢有冇投資價值。此外，仲有一個問題，係香港上市、市值超過二百億嘅燃氣公司，最高嘅市盈率都只係32.63倍。假如中然氣嘅市盈率要係一年內要降到呢個水平，以現價1.41元計算，咁每股盈利就大約要有0.043元，15年全年純利要有4.87億港元。到底要係點樣嘅情況下，一個業務喺一年內，可以由冇到有，由零盈利貢獻去到淨賺4﹒87億元﹖除左注入資產或收購已經運作嘅公司，真係幾乎冇可能。