利好股價上升的元素

今鋪講最貼身的野，揀股。

市場上有唔少有經驗的人，會就住股票有冇一啲利好股價上升的元素，來進行揀股。我總結左一部分出來，然後選擇啱我風格的方法來用。由於我呢啲不涉及內容消息，都係用公開資料來分析，然後基於有利因素來做「價值投機」，等市場來推高股價，所以好肯定話你知，用我呢套係唔適宜炒股，你想賺快錢，你去睇圖表同技術分析好過。

閒話少講，來料。

1﹒股權集中度

金融市場唔係善堂，冇人特登舞高股價俾你賺錢。如果你想贏，你要搵出一啲利益同你一致的莊家或者大股東，去幫你推高或質低股價。

就買股價升的角度來講，股權集中度係關鍵，因為股權愈集中喺某一個或某一班人手上，佢地就愈有動機去推升股價。原因好簡單，人係自利的。當你有持有一間公司1億股價票，每股值1元，你就賬面有1億元；每股值2元，你就賬面有2億元。所以，當大股東或莊家持有大量股票，緊係就做世界的多啦。

我自己覺得，喺公開資料中，大股東及莊家要持有70%或以上的股權，間公司的股權集中度先算高。不過，如果間上市公司的市值細小，咁60%或以上的股權都勉強算係集中。通常，股權集中喺大股東或莊手上，就冇咁易流通，一來係客觀現象，二來可能佢地會想喺股價升得不合理高先想賣。Anyway，反正就係佢地好少會大手沽貨。

咁，點樣搵大股東或莊家的持股﹖

大股東呢環比較容易解決，你去睇上市公司最新的年報或中期報告，通常喺「董事會報告」或「其他資料」呢一欄搵到，當然間間公司的分類可能有唔同，耐心啲搵下啦。此外，有時候喺啲年報出左之後，有股東會減持、增持或者行使衍生工具換股權，咁就要睇翻股權通告或港交所的「權益披露」，來確定返。

至於莊家，就好難查。一般會基於中央結算系統(CCASS)來估計，喺CCASS中，再揀選「集中度」(Concentration)欄目下的「Top10+NCIP」來睇，Top 10係指首10間持有最多目標上市公司股權的券商，NCIP係指匿名股東。

「集中度」所指的股權，係指位於中央結算系統中的股權，亦只有位於中央結算系統中的股權，先至可以喺市場上交易，我地稱之為「街貨」。市場傾向相信，公司股權唔會咁啱由某少數券商代大量股東持有，如果「Top10+NCIP」的百分比水平高，意味當中有相當多的股權由大股東或莊家持有。

我個人認為，當「Top10+NCIP」在85%或以上，屬於高的水平。

2﹒市值

股價係市場對股票供求的結果，呢點我喺「大‧時‧代」果篇文已經講過。「需求」，由市場資金的數量同市場對某啲股票的想要的程度構成；「供應」，就係股票喺市場上的流通量同市值構成。

流通量呢一環，同股權集中度有關，股權愈集中，流通量通常愈低。至於市值，當市值愈細小，就等於供應愈少，因為你買起呢批股票所需要的資金亦相應少得多。

市值細小的定義，一般隨「殼價」而定。2015年初，港股市況相對平淡，殼價係5億，市場傾向認為所有股權市值小於或等於5億元，為之市值細。但如果喺好似2015年4月相對熾烈的市況，就會例外，小於或等於15億元亦算小。

(待續)

相關文章：

大‧時‧代

https://www.blogger.com/blogger.g?blogID=6445832563888422990#editor/target=post;postID=6134301158339212260;onPublishedMenu=posts;onClosedMenu=posts;postNum=8;src=link